जनसम्पर्क समिति बेलायतको भावि नेतृत्व- चिरन शर्मा

नेपाली जनसम्पर्क समिति बेलायतको दोस्रो अधिवेशन आगामी जुन २० का दिन लण्डनमा हुँदैछ । बेलायतबासी कांग्रेस समर्थकहरु यसको तयारीमा लागेका छन् । अधिवेशनका लागि चाहिने न्युनतम तयारी पूरा भइसकेको बताइएको छ । यो अधिवेशन मध्यावधिमा हुन लागेको अधिवेशन हो । विधानत तीन वर्षको कार्यकाल भएको वर्तमान कार्यसमितिको कमजोरीका कारणले अधिवेशन करिब ढेड वर्ष पहिला नै हुँदैछ । पहिलो अधिवेशनमा निर्वाचित कार्यसमितिलाई बीचैमा घुँडा टेक्न बाध्य पारिएको थियो ।
वर्तमान कार्यसमिति निर्वाचित भए पछि कामहरु नभएका भने होइनन् तर कुशल नेतृत्वको अभावका कारण संस्थागत विकासमा खासै काम हुन सकेन भन्दा पनि हुन्छ । सामान्यतया नेताहरु यूके आउँदा स्वागत, विपी जयन्ती, विपी स्मृति दिवस, गणेशमान स्मृति दिवस, मेलमिलाप दिवस मनाउने जस्ता नियमित र औपचारिक कार्यक्रमबाहेक रचनात्मक काम गरेको देखिएन । तत्कालीन तदर्थ समितिले गठन गरेका क्षेत्रीय समितिको पनि सहि परिचालन नहुनु, आर्थिक अनुशासनलाई कडाइका साथ परिचालन नगर्नु, क्षेत्रीय समितिको अधिबेशन नहुनु, कार्यसमितिमा बारम्वार हेरफेर गर्नु र विधानत समिति नचल्नु मुख्य कमजोरी देखिए । पहिलो अधिबेशनबाट निर्वाचित कार्यसमिति पार्टी हितलाई सर्बोच्च मानेर अगाडि बढ्नुको सट्टा ब्यक्तिब्यक्तिको आपसी तानातानमा रुमल्लिएर बस्यो । यसको सम्पूर्ण जिम्मेवारी नेतृत्वले मात्र नभै सिंगो कार्यसमितिले लिनुपर्ने देखिन्छ । यो अधिबेशनले बर्तमान कार्यसमितिको क्षमता र कामको मूल्यांकन अवश्य गर्नेछ ।
नेपाली जनसम्पर्क समितिको स्थापनाकाल देखिनै समस्या झेल्दै आएको छ । बिगतलाई हेर्दा कुनै नीतिगत वा संस्थागत समस्या भन्दा पनि ब्यक्तिगत समस्याका कारणले सिंगो संस्थाले दुःख पाएको छ । जनसम्पर्क समितिभित्र बारम्बार आउने समस्याले गर्दा वेलायतमा रहेका कांग्रेसजनहरु बाहिर निस्कन सकिरहेका छैनन् । हालसम्म जनसम्पर्क समितिका गतिविधिले कांग्रेसको शिर माथि उठाउन सक्ने र समितिप्रति गर्व गर्न सक्ने वातावरण तयार भएको छैन । अब हुन लागेको दोस्रो अधिबेशनबाट नेपाली जनसम्पर्क समितिको मुहार फेर्ने अवसर बेलायतबासी कांग्रेसजनमा आएको छ । यो अवसरलाई सहि तरिकाले प्रयोग नगर्ने हो भने झुकेको शिर अवश्य माथि उठ्ने छैन । कुनै ब्यक्तिलाई नेतृत्वमा पुर्‍याउने अवसरको रुपमा मात्र अधिवेशनलाई लिनुहुँदैन । अधिवेशनसँग सँगै जनसम्पर्क समितिलाई पुनर्निर्माण गरिनुपर्छ । स्थापना काल देखिनै कमजोर धरातल भएका कारण समिति बारम्बार डगमगाई रहेको छ । कमजोर धरातललाई पन्छाएर एउटा सशक्त धरातलको निर्माण अहिलेको आवश्यकता हो । संस्थागत मूल्य र मान्यता बुझेको र संगठनलाई गन्तब्यस्थल सम्म पुराउन सक्ने ब्यक्तिले नेतृत्व लिनुपर्छ । यदि आगामी अधिबेशनमा पनि साधारण सदस्यहरुले बुद्धिमानी तरिकाले नेतृत्व चयन नगर्ने हो भने पुरानै अवस्था दोहोरिने प्रायः निश्चित छ । पुनः कुटाकुट, झैझडा र विवादका बारेमा समाचार पढ्न र सुन्न बाध्य हुनुपर्ने छ ।
अधिवेशनको यस पावन घडीमा उठौं, जुटौं र संगठित बनौं, विश्वास सद्भाव र एकताको वातावरण तयार गरौं । यही समयको माग हो । भाइ फुटे निश्चित रुपमा लुटिनुपर्छ । एकताको बलले नै लक्ष्यको शिखर चुम्न सकिन्छ । प्रजातान्त्रिक समाजवादमा आस्था राख्ने तमाम बेलायतबासी नेपालीहरुले अहिलेको अधिवेशनबाट यही अपेक्षा राखेका छन् । पदीय स्वार्थ त्यागेर सबैले संस्थाको बारेमा सोच्ने समय आएको छ । अधिवेशनमा व्यक्तिमात्र होइन नीतिको पनि चर्चा गरिनुपर्ने माग सदस्यहरुले गरिरहेका छन् । प्रबुद्ध वर्गको सक्रियतामा अधिवेशन सफल हुनेछ र जनसम्पर्क समितिले गति लिनेछ भन्ने आशा सबैले लिएका छन् । यसका लागि सबै सचेत हुन आवश्यक छ ।
- लेखक नेपाल बृटेन डट कमका प्रधानसम्पादक हुनुहुन्छ )