गोर्खा भर्तीका व्यथा गुन्दै कृष्णकुमार राई

बेलायतको बसाई, गोर्खालीको कथा, त्यसमाथि रोकिएका “सेवा र सुविधा”का पक्षमा गर्नुपरेको लडाई। एउटा इतिहासमा गरिबीबाट मुक्त हुने सपना साँचेर अघि बढेको लाहुरेको कथा हो यो। यी
लाहुरेको नाम हो कृष्ण कुमार राई। भोजपुर साङ्पाङ् गाविस वार्ड नं. ८ मा जन्मनुभएका राई भूतपूर्व बेलायती सेना हुनुहुन्छ। मध्यम वर्गिय परिवारमा जन्मनुभएका राईले एसएलसीसम्मको अध्ययन भोरपुर कै दिङ्लाबाट सकेर भोजपुर
सदरमुकाममा आइए तहको अध्ययनमा लाग्नुभयो। त्यसै बखत वि.सं. २०३६ साल अर्थात सन् १९७९ मा साथीभाईहरुमा आएको लाहुरे जीवनको मोहसँगै उहाँमा पनि लाहुरे हुने रहर पलायो। र त
गाउँमा जाने गल्लाको नापजाँचका लागि सामेल भई गल्लाले छनौट गरेपछि सोही वर्ष धरानबाट छनौट भइ पूर्वी नेपालको धरानबाटै बेलायती सेनाका लागि योग्य ठहरिनुभयो उहाँ। १५/२० दिन धरानको घोपाक्याम्पमा सलोट हान्नेजस्ता साधारण अभ्यास गरेपछि उहाँलाई हङ्कङ्को सेकङ्मा नौ महिना तालिम गराइयो। तालिम पुरा गरेपश्चात उहाँसँगै भर्ती भएका गोरखालीहरु
इन्टेक ७९ को 10 GR मा राखियो। 10 GR मा कार्यरत हुदाँ एक्टिभ वटालियनका रुपमा रिफ्रेस तालिम गर्न वटालियनका अरु साथीहरुसँगै १९८० मा ब्रुनाई पुग्नुभयो उहाँ। ६ महिनाको सो
तालिममा सहभागी हुँदा उहाँलाई जीवनकै ठूलो निराशा लागेको थियो रे। परिवारमा एक्लो छोरो, दुःख नगरेको व्यक्ति र नेपालमा नै पढेर केही गरुँ भन्ने मानसिकता भएकोले त्यस्तो महसुस भएको
उहाँ बताउनुहुन्छ। तर साथीहरुको भनाई र पैसाको आशामा हङकङ ब्रुनाई पुगेका कारण काम छोडीहाल्ने कुरा पनि भएन। गोली हान्ने लडाईको तयारी गर्ने तालिममा सहभागी भैरहँदा दर्दनाक
पीडाको अनुभूति भएपनि काममा दखल पार्न नसकेको कुरा सुनाउने उहाँ कामका बखत राति साथीहरुबीच रुँदै कुरा गरेका दिनहरु अहिले पनि ताजै छन् भन्नुहुन्छ । तालिम अवधि दुःखकासाथ सकिएपछि आफ्नो आर्मी क्यरियरको सुरुवात भयो र प्रमोसनका कोर्स गर्दै गए पश्चात सन् १९८३ मा लेन्सकपुल दर्जा पाउन सफल भनुभयो उहाँ। कर्तव्य पालन गर्ने शिलशिलामा सन् १९८४ को जुन महिनामा ग्रिनेडामा युद्ध सुरु भएको बेला सो युद्धमा जान एयरपोर्ट गएर प्लेन चढेर उड्न तयार रहँदा घरको यादले दुखित भएको सुनाउनुहुने राई
उड्न लाग्दा पल्टनका कमाण्डिङ अफिसर Lt.Col MT cook ले ग्रीनेडा अमेरिकाले लिइसकेको र जान नपर्ने भएपछि दुई हप्ता सवैलाई विदा दिएको कुरा सुने पछि जीवनको दोस्रो खुसिको क्षण
बन्यो भन्नुहुन्छ। दुई हप्ताको विदामा मेक्सिको च्यातेमाला लगायतका ठाउँमा घुम्दै विदा सकिए पश्चात पुन वेल्जियमबाट यूके फर्केपछि जर्मनको Airborn Brigade मा जर्मन, यूके, अमेरिका,
क्यानडा लगायतका सेनासँग तालिम लिने अवसर पाउनुभयो उहाँले। साढे एक वर्ष जर्मन वसे पश्चात उहाँको स्वास्थ्यमा केही खरावी उत्पन्न भयो। त्यतिबेला हङकङमा आई हेर्डक्वार्टरको कम्पनीमा मेडिकल सेक्सनमा सात वर्ष काम गर्नुभयो उहाँले। एक तह पदोन्नति
भएपछि उहाँले वेलायती सेनामा साढे १३ वर्ष काम गरेर सन १९९२ मा विदा पाउनुभएको थियो। बेलायती सेनामा साढे १३ वर्ष काम गरेपछि रिटायर्ड भएर नेपाल पुगे पछि उहाँले गोरखालीको पक्षमा
कार्य गर्ने चासो बोक्नुभयो। सन् १९४५ को मध्यतिर गोरखालीको पक्षमा काम गर्ने पदमबहादुर गुरुङसंग भेट भएपछि उहाँले पनि गेसोको केन्द्रीय समितिलाई सहयोग गर्न थाल्नुभएको थियो। वि.सं.
२०५३ साल कार्त्तिक १ गतेको केन्द्रीय समितिबाट सचिव पदमा रहेर काम गर्नुभएका उहाँ गोरखालीको पक्षमा वेलायती सरकारले गरेको भेदभाव तोड्न खुलेर लाग्नुभयो। बेलायती सेनामा कार्यरत गोरखालीहरुको पक्षमा देशभित्र र बेलायतमा समर्थन जुटाउन निरन्तर लाग्नुभएका राई वेलायती सरकारलाई दवाव दिन नेतृत्वदायी भूमिका खेलिरहनुभएको छ अहिले पनि।
हाल उहाँ गेसोको केन्द्रीय उपसभापति रहेर काम गरिरहनुभएको छ। वेलायती सरकारलाई विपक्ष बनाएर गोरखाली र वेलायतीले पाउने समान सेवा, सुविधा र आवासीय भिषाको मुद्दामा लड्नुभएका
उहाँ गोरखालीहरुको सम्मान हुनुपर्ने बताउनुहुन्छ।